ඔබ පුන්සඳ වේද නැතහොත් හිරු මඬලම වේද

 

ඔබ පසළොස්වක පුන්සඳ වේද
නැතහොත් හිරු මඬලම වේද
ඒ කවරක් වුවද, දිවුරමි
නැත අන් කිසිවකු ඔබට සම
 
වළාවක් වැනිය ඔබ වරල වැටුණු උර මත
ඔබ දෙනයන සදිසිය මදිරා පිරි කුසලාන
ප්‍රේමයේ මත්බව රැඳුණු ඒ සුරාව ඔබමය
 
විලෙහි හිනැහෙන කමල මෙන් වේය ඔබ වුවන
නැතහොත් දිවි වෙණ මත වැයෙන පෙම් ගීය
සොඳුර, ඔබ කිසි කවියකුගෙ හිස රැඳි සිහිනය ය
 
රඟ දේ දෙඅදර සිනාවේ විදිලිය
අහස් ගඟ වැතිරේ ඔබ යන මඟ දිගට
ලොව ආදරය හා සුන්දරියන් අතර
ඔබම වේ ඒ දෙකෙහි අග තැන් රැඳෙන
 
 
 
චිත්‍රපටිය: චෝදහ්වී කා චාන්ද්
ගී පද: ශකීල් බදායුනී
සංගීතය: රවී
ගායනය: මොහම්මද් රෆී

සංවේදනා

 

ගිම්හානයේ නිල්වන් සැඳෑවල,
පය තබා කදිම තණපත් මත
ඇනෙන තුත්තිරිවලින් පීඩිතව
අඩිපාරවල පිය නඟමි මම.
තණපත්වල සිසිල,
දැනෙනු ඇත මා දෙපයට,
සිහිනයකදි බඳුව.
හමන සුළඟට,
හිස්වැසුම් විරහිත
මහිස නහවන්නට
ඉඩ හරිමි මම.
 
කිසිත් නොදොඩමි මම
නොනැඟෙනු ඇත
කිසිදු සිතිවිල්ලක් මසිත‍:
එනමුදු පිරී යනු ඇත ආත්මය
ආදරයෙන් අපරිමිත.
ඇවිද යනු ඇත මා බෝ දුර
සොබාදහමෙහි සරන
අහිකුණ්ටිකයකු විලස----
ප්‍රීතියෙන් ප්‍රමුදිතව
මියුලැසියක මා සමඟ
සිටිනා කලෙක මෙන.

 

- ආතර් රැම්බෝ (1854-1891) 

(ස්ටැන්ලි අපෙල්බෝම් ප්‍රංස බසින් ඉංගිරිසියට කළ පරිවර්තනයෙනි.)

  

Painting by: Edward Mitchell Bannister