මතකය

 

මගේ සිත අමතක කර දමයි බොහෝ දේ

සංග්‍රාමවල දින, රජවරුන් මැරුණු දින වැනි,

එනමුදු, එපිට ගම්මානයේ හෝරා කණුවේ

මද්දහන සනිටුහන් කළ,

මැයි මහේ අන්තිම නීලවන් මද්දහන් පැය

සිහියට නඟා ගත හැක මට හරියටම:

රැළි නංවමින් මඟ පසෙක ඇති දියකඳුර මත,

සුළඟක් හමා ආයේය යුහුසුළුව මෙදෙසට,

ඉක්බිති මෙතැන නතරව,

බිම තබා සිය පයින්-සුගන්ධිත බර,

සොලවා බිම හෙලී,

කැලෑ රෝස ගසෙන් අර,

පෙති දෙකක් උකටලී ලෙස.

-තෝමස් බේලි ඕල්ඩ්රිච් (1836-1906)

 

චිත්‍රය: Paul Cezanne