2015/08/19

කම්කරුවෙක් ඉතිහාසය කියවයි



කවුරුන්ද තැනූයේ තීබසයේ සප්තද්වාරය?
පොත් පිරි ඇත රජවරුන්ගේ නම්වලින්
එය සදන්නට ඇවැසි රළු කලුගල්
ගෙනගියේ රජදරුවන්ද සිය කර මතින්?
විනාශයට පත් බැබිලෝනය බෝ වරක්
කවුරුන්ද ගොඩනැගූයේ යළි යළිත්?
රත්තරනෙන් දිදුල ලීමාවේ නිවෙස්වල
විසුයේද ඒ තැනූ කිසිවෙකුත්?
චීන මහපවුර තනා නිමවූ සැඳෑවේ
කොහි ගියෙද එය සැදූ පෙදරේරුවන්?
අදිරදුන් දිනු රෝම නගරය
පිරී ඇත නෙක ජය සමරුවෙන්
කවුරුන්ද තැනූයේ ඒ සමරු?
දිනුවේ කවුරුන් මැඬද සීසර්?
දවස’රියි බයිසන්තියම ගීයෙන්
විණිද එහි වූ සියලු ගේ දොර මාලිගාවන්?
සාගරය ගොඩගලා යටවු විට ඇට්ලාන්ටිස් ද්වීපය
විලාප නොගැසීද දියෙහි ගිලෙනා මිනිසුන්
සිය වහලුන් කොහිදැයි අසමින්?

යොවුන් ඇලෙක්සන්දර කළේ දික්විජය භාරතය
දික්විජය කළේ තනිව ඔහු පමණකිද?
සීසර් පැරදවී ගෝල් දෙස වැසියන්
නොවිණිද ඔහුගෙ සේනාවේ අරක්කැමියෙකුවත්?
ගිලී වැනසුණු කල නෞකා පංතියම
හඬා වැටුණේය ස්පාඤ්ඤයේ පිලිප් රජු
නොහැඬීද ඉතින් වෙන කිසිවෙකුත්?
ග්‍රීසියේ ෆ්‍රෙඩ්රික් දිනුවේය සත්වසරක යුදය
නොවිණිද ඒ ජයෙහි වෙන කොටස්කරුවන්?

ඉතිහාසයේ හැම පිටුවකම ලියැවී තිබේ දිනුමක්
කවුරුන් නිසාදෝ ඒ දිනුම් සැමරුණේ?
සෑම දශකයකම ඇත මහා පුරුෂයෙක්
කවුරුන්ද ඇත්තට ඊට දායක වුණේ?

විස්තර රාශියකි.
ප්‍රශ්නද රාශියකි.














-බර්ටෝල්ට් බ්‍රෙෂ්ට් (1898-1956) 

Painting by Steve Noon

9 comments:

  1. නියමයි නිලූක...

    ReplyDelete
    Replies
    1. ඇගයීමට ස්තූතියි නලීන්.

      Delete
  2. සූරියප්පෙරුම19 August 2015 at 04:09

    උත්තරේ බොහොම සරලයි නෙ හසන්ත ! ජනතාව යාලු වෙන්නෙ ගොවිරාල එක්ක මිසක් උදැල්ල එක්ක නෙවෙයි.

    ReplyDelete
    Replies
    1. ඔබ හරියටම හරි. කියෙව්වාට ස්තූතියි.

      Delete
  3. බ්‍රටෝල්බ්‍රෙස්ට් කියන්නෙ විශිෂ්ඨ කතුවරයෙක්. මේ පරිවර්තන ගැන නම් ඔබට ස්තුති කරන්නම ඕනේ. හේතු දෙකක් නිසා.
    1. විදේශීය භාශාවලින් කෙරෙන නිර්මාණ මෙරට පරිවර්තනවලට කැමති පාඨකයාට ලබා දීම.
    2. ඒවා පොත් වලට සීමා නොකර මෙසේ සියලු දෙනාට රස විඳිය හැකි ලෙස බ්ලොග් සටහනක් ලෙස එකතු කිරීම

    ReplyDelete
    Replies
    1. ඔබේ අදහස් දැක්වීමට ස්තුතියි. බර්ටෝල්ට් බ්‍රෙෂ්ට්ගේ නිර්මාණයක් මේ බ්ලොග් අඩවියේ පළකරන පළමුවැනි වතාවයි මේ.

      Delete
    2. ඔබ නිවැරදි ඇති. මා ඒ ගැන කියන්න දන්නේ නැත්තේ අලුත් බ්ලොග් කාරයෙක් නිසා. ඔයාගේ බ්ලොග් එකත් හම්බුනේ අහම්බෙන්. පරිවර්තන කියලා තිබුන නිසා මම කියෙව්වා. මම පරිවර්තන ආසා කරන කෙනෙක්. ඒ නිසා ඔබේ මේ බ්ලොගය මගේ හිත ගත්තා.

      Delete
  4. බොහොම ස්තුතියි නිලුක මේ වගේ උසස් නිර්මාණ තෝරා බේරා මනාව පරිවර්තනය කොට අපට රස විඳින්න සලසනවාට

    ReplyDelete

සෙවුම්