ඔබට පෙම් කරමි මම

 

ලුණුවල තවරා පාන් බුදිනා කලෙක මෙන්
දැඩි උණෙන් පෙලෙමින් මහ රෑ අවදිව
කරාමයට මුව තබා දිය බොන කලෙක මෙන්
තැපැල්කරු ගෙන ආ බරැති පෙට්ටිය
කුමක් වේදැයි එතුළ හාංකවිසියකුදු නොම දැන
කලබලව, සතුටින්, සැකසංකා ඇතිව
වැහුම් අරිනා කලෙක මෙන්
ඔබට පෙම් කරමි මම
 
ගුවන් යානයක නැඟ, පළමුවැනි වතාවට
මුහුදට උඩින් පියාඹා යන කලෙක මෙන්
ඉස්තාන්බුල් නුවරට මුදු ලෙස අඳුර වැටෙනා විට
මා ඇතුළත යමක් කැළඹෙන කලෙක මෙන්
ඔබට පෙම් කරමි මම
 
ජීවත්වීම වෙනුවෙන් දෙවියන්ට තුති පුදන කලෙක මෙන්
ඔබට පෙම් කරමි මම

 

-නසීම් හික්මෙට් (1902-1963)
 
(රැන්ඩි බ්ලේසිං හා මුට්ලු කොනුක් තුර්කි බසින් ඉංගිරිසියට කළ පරිවර්තනයෙනි.)
 
Painting by Ivan Konstantinovich  Aivazovsky

ගංදිය

I

ගඟ හරහා වැටුණු මේ තුරු කඳන් අබියස

මා ඔරුව නවතන තුරුම

පා විණිමි ගංදිය දිගේ මම.

 

බිඳෙනසුළු තුරුපත්, පන්ගස් මෙන්ම

වර්ණ විරහිත ජලතලය හා පාට වියැකෙන දුඹුරු කඳු මත

ගලා යයි මෙහි මිහිදුම.

 

පාවෙන තුරුපතක් වූ ඇය

පැමිණ ඇත තුරුවියන යට සිට

සරමින් මිහිදුම් පටල මැද.

 

II 

අහෝ, සැඳෑවෙහි නීල වර්ණැති කුසුම

රජතවන් ඔබ තුරුපත් සමඟ

ස්පර්ශ කොට ඇත මා වුවන.

පිටව යා යුතු හෙයින් මා, පෙම් කරනු මැන මා හට.

-රිචඩ් ඇල්ඩින්ටන් (1892-1962)

 Painting by: Joe Cartwright

  

මතකය

 

මගේ සිත අමතක කර දමයි බොහෝ දේ

සංග්‍රාමවල දින, රජවරුන් මැරුණු දින වැනි,

එනමුදු, එපිට ගම්මානයේ හෝරා කණුවේ

මද්දහන සනිටුහන් කළ,

මැයි මහේ අන්තිම නීලවන් මද්දහන් පැය

සිහියට නඟා ගත හැක මට හරියටම:

රැළි නංවමින් මඟ පසෙක ඇති දියකඳුර මත,

සුළඟක් හමා ආයේය යුහුසුළුව මෙදෙසට,

ඉක්බිති මෙතැන නතරව,

බිම තබා සිය පයින්-සුගන්ධිත බර,

සොලවා බිම හෙලී,

කැලෑ රෝස ගසෙන් අර,

පෙති දෙකක් උකටලී ලෙස.

-තෝමස් බේලි ඕල්ඩ්රිච් (1836-1906)

 

චිත්‍රය: Paul Cezanne

 

 

 

සැරිසැරීම

 

හදවත තවමත් ප්‍රේමයෙන් පිරුණද

සඳවතිය තවමත් සුදිලෙමින් තිබුණද

නොයමුය ඉදින් තවත් සැරිසරන්නට

රැයේ ඒතරම් පමාවන තුරුම

අසිපත ලන කොපුව, අසිපතට පෙර වැනසෙන නිසා

ආත්මය නැසී යනු පළමු ළය වැනස යන නිසා

හුස්ම ගනු පිණිස හද මඳකට නතර විය යුතු නිසා

ආදරයම වුවත්, ඉසිඹු ලෑ යුතු නිසා

ආදරය කරන්නට රැය සැදුණේ වුවද

ඉතාමත් ඉක්මනින් දහවල පැමිණියද

නොයමුය ඉදින් තවත් සැරිසරන්නට

සඳඑළිය මැද හාත්පස පැතිරුණ 

-ජෝර්ජ් ගෝර්ඩන් (බයිරන් සාමිවරයා)-(1788-1824) 

චිත්‍රය: François Cachoud